مراحل تنفيذ الموقع الالكترونى
بعد ما خلصنا مرحلة التحضير للموقع الخاص بيك بنبدأ مرحلة التنفيذ …
 
مرحلة التنفيذ بتبدأ من نقطة نهاية مرحلة التحضير …. بعد ما اتفقنا معاك وخدنا منك الموافقة على المميزات والاقسام الرئيسية اللي هتبقى موجودة في الويب سايت بتاعك بيبدأ فريق المصصمين والمطورين في انهم يشتغلوا على انشاء الموقع الخاص بيك وهنا لازم تعرف ان عملية تنفيذ موقعك بتتم على 6 مراحل وهم
 
1- حجز اسم النطاق والاستضافة
ايه هو النطاق؟؟…. النطاق هو اسم الموقع الالكتروني الخاص بيك او زي ما بنقول عنوانه على الانترنت وهنا احنا بنعرض عليك اكتر من اختيار واكتر من اسم نطاق وبنختار معاك الاسم الانسب والمتاح
 
اما بالنسبة للاستضافة فهي المساحة التخزينية الخاصة بالموقع الالكتروني بتاعك والمساحة دي هي اللي بنخزن عليها المعلومات والداتا والصور وكل حاجة بتكون موجودة على موقعك الالكتروني وبنراعي اننا نقولك على انسب مساحة ليك بحيث انها ما تبقاش مساحة قليلة على الداتا اللي هتخزنها عليها وفي نفس الوقت ما تبقاش مساحة كبيرة فتبقى over cost او عاملة زيادة في السعر عليك وخلاص
 
اما بقى لو عند اسم نطاق جاهز ومساحة استضافة جاهزة فانت مش هتعدي معانا على المرحلة دي اصلا وبنخش على طول في المرحلة اللي بعدها
 
2- مرحلة التصميم الخارجي.
تاني خطوة بتكون استلام المعلومات واللوجو الخاص بشركتك…. بنبد بعدها تصميم الهيكل الخارجي للموقع الالكتروني الخاص بيك وهنا بنراعي ان التصميم يكون متوافق مع مجال شركتك الى جانب ان التصميم يكون جذاب ويتميز بجودة بصرية عالية
 
3- مرحلة عرض ال demo
يعني ايه demo اصلا ؟؟ …. ال demo ده مصطلح احنا بنطلقه على التصميم الخارجي لانه بيكون عبارة عن هيكل غير مكتمل وهنقولك بنكمله ازاي دلوقتي ولكن بنعرض عليك الديمو عشان ناخد موافقتك عليه او تعديلاتك عشان نوصل في النهاية للشكل الخارجي اللي احنا الاتنين نكون راضيين عنه
 
4- مرحلة البرمجة
في المرحلة دي بيشتغل المبرمجين عندنا في الشركة على البرمجة الاساسية للموقع وعشان نبسط عليك الموضوع
 
فريق المصممين والمطورين بيقوم بعمل حاجة اسمها لوحة التحكم الخاصة بالموقع ومن اسمها هي دي الجزء الاساسي اللي بتقدر من خلاله انك تتحكم تحكم كامل في الموقع الخاص بيك من حيث تعديل الشكل الخارجي او اضافة او حذف اي جزء او اي action عايز تعمله عموما في موقعك الالكتروني
 
5-مرحلة الTESTING
 
المرحلة التجريبية للموقع الخاص بيك بتبقى عبارة عن مرحلة بيقوم بيها فريق مخصص عندنا في الشركة في انه يستخدم كل قسم من اقسام الموقع الخاص بيك ويكشف عن وجود العيوب والمشاكل البرمجية او زي ما بنقول عليها ال BUGS ان وجدت ده غير طبعا التأكد من اجراءات الحماية والامان الخاصة بموقعك
 
والمرحلة دي بتعد من المراحل الاساسية عندنا في الشركة عشان من خلالها بنقدر نضمنلك موقع الكتروني مصمم باحترافية ويتميز بجودة عالية في جميع محتوياته ومكوناته وخالي من العيوب الفنية والتقنية والبصرية
 
6- مرحلة العرض النهائي
في المرحلة دي بنعرض عليك الموقع بعد ما بتكون مرحلة التنفيذ كلها بخطواتها الاساسية خلصت وبنستضيفك عندنا في الشركة عشان نبدأ معاك تدريب صغير بتعرف من خلاله ازاي تتحكم في موقعك الالكتروني تحكم كامل من خلال لوحة التحكم الخاصة بموقعك الالكتروني
 
وبكده نكون خلصنا مرحلة تنفيذ موقعك الالكتروني كاملة …. بنعمل ايه بعد كده ؟؟
عشان تعرف اجابة السؤال ده محتاج تكمل معانا رحلتنا جوة شركتنا العزيزة <3
استنى المقال اللي جاي ولو عندك اي سؤال او استفسار ممكن تبعتلنا واحنا هنرد عليك في اسرع وقت